Bannað að glápa
Hún yndislega Joanna Newsom er pikkföst í hjarta mínu. Ég elska þennan disk hennar svo mikið. Það sem mér finnst einkennilegt við þetta er að ég er eiginlega búin að hlusta á þennan disk stanslaust síðan í september á síðasta ári. Venjulega þarf ég að senda diska sem ég ofspila í frí, en ekki þennan. Ástæðan fyrir því að ég er að segja frá þess er sú að nú eru bara nokkrir dagar þangað til að ég fer og hlusta á hana. Meira að segja tvisvar. Ég er svoooo spennt. Þessi rödd og harpan hennar bræða mig alveg – svo fagurt, svo fagurt.
Áðan var ég að hlusta á hana í Mr. Pink. Þá fór ég að ímynda mér hvernig það væri að gráta gulltárum því ég er viss um að ef það væri hægt þá myndi ég gráta slíkum tárum undir fögrum tónum hennar. Nema hvað... heldurðu ekki að ungfrúin hafi ekki bara tárast út á miðri götu. Er svo viðkvæm sál. Grét ímynduðum gulltárum útaf skyndilegri augnablikshamingju. Mjög pínlegt og fólkið sem ég mætti á leiðinni glápti bara á mig. Agalegt... en allaveganna. Það er bannað að glápa á grátandi fólk, sér í lagi ef það grætur gulli. Já, muniði það.
Hamingjutárakveðjur,
Kristjana sem bíður spennt eftir helginni